2011-04-04

كايضرني خاطري- بالدرجة المغربية


بسم الله



كايضرني خاطري فاش كانشوف الشعب شوية مفرق 
خليونا نتوحدو كاملين نحيدو الشعار المنمق
حركة 20 فبراير ..  خلات بنادم حاير ...
شلا ماقالو عليها  هي حركة شعبية
.. يسارية عدلية ..  سلفية حقوقية
حركة 20 فبراير كاتمثل كلشي هادو
حيت اصلا الشعب مكون من كلشي هادو
فيها شباب ضد الفساد يعني مواطنون
كايصنعو الحياة فالدولة تالحق والقانون
كايقولو للشفارة باركا  او مامفاكينش
بلا اصلاح اوبلا  عدل حنايا كاع ماعايشينش
بالنهج الديموقراطي والعدالة الملكية
بغينا الملك لكن مابغيناش العبودية
الحياة ديك الساعة عاد ممكن تحلى لينا
بغينا فالمظاهرات ماتبان غيرالراية المغربية
 لي الخضر فيها كايمثل سلمية
والحمر كايمثل الرفض للي.. ضد الحرية.



خاطري.. كايضرني .. فاش كانشوف شي بعضين
كايقوليك المغرب ماشي بحال تونس اولا مصر
الحمد لله العام زوين ، فين ساكن هاذا فين ؟؟؟
 زعما زعما ساكن معانا هنايا فهاد البلاد
 ولا انت نتاج  دوزيم شغلوعقلك مسكين ...
رماد الحب أو ديابلو ازيد اوزيد كثرو التالفين فينا
 لي مابقاوش عارفين فينا هوما او حقوقهوم  فين؟؟ '
كايضرني خاطري فاش كانشوف علماء البلاط
الرابطة المحمدية المجالس العلمية كلهم تحت السباط
كايضرني خاطري فاش كانشوف شي ارقام خيالية ..
الاف .. ملاين . لا هادو ملاير ..
مشاو لينا باسم الكرة ومهراجانات فنية
كايضرني خاطري فاش كانشوف احزاب مادارت والو
حادكين اوجدو فالانتخابات اشنو غادي يقولو
هذا مخطط جديد غايخلي المغرب فالمستقبل  حالو هو حالو

كايضرني خاطري فاش كانشوف عائلة العباس
مفرقة الدولة بحالا فدارها والجوع ضارب الناس
كايضرني خاطري فاش كانشوف شي واحد كايدوي
زعما داير فيها صحفي او كايوعي
تايكتب بجراة اوتايفوت ازولاي و الماجدي
كايضرني خاطري فاش كانشوووف واحد صاحب الملك
اسس حزبو البارح  كاع  ماصوتنا اوناجح
البقاء للي صالح .. واخا تزورو بموالك
كايضرني خاطري فاش كانشوف شي وحدين تايركعو
لبن ادم  لي مانهاهوم واخا  ليه تايسمعو
ويلاهضرتي على الحق المخزن غادي يعتقلك
ماشي بعيد يعتقلوني اومابقيش تسمع لصوتي
هانيا .. راني..  اصلا فحبس كبير
حيت محبوس كاع لي ما عندو حرية التعبير
واشنو باقي الفرق مابين حياتي ولا موتي
الى ما رفعت راية الحق واخ غير بصوتي







هناك تعليق واحد:

  1. جميلة هي كلماتك، و مؤثرة عباراتك! سلمت أصابعك التي رفعت قلم الحق و الحقيقة

    ردحذف